2 Kings 9
1 該時，先知以利沙喊一個後生先知來，吩咐佢：「遽遽繫好腰帶，帶這罌橄欖油到基列个拉末去。
2 到該位，你就尋約沙法个孻仔耶戶，就係寧示个孫仔，帶佢離開佢个同伴，到一間無人个間房去，
3 將這橄欖油倒在佢个頭那頂，講：『上主宣佈講：𠊎膏油設立你做以色列个王。』然後你就開門，遽遽走，毋好停跎。」
4 所以，該後生先知就到基列个拉末去。
5 佢在該位看到有兜軍官堵好坐共下，就講：「將軍，𠊎有話愛對你講。」耶戶問：「𠊎等當中你愛㧯㖠位講話呢？」佢講：「將軍，就係你。」
6 所以佢兩儕進入一間屋肚；該後生先知將橄欖油倒在耶戶頭那頂，對佢講：「上主—以色列个上帝恁樣宣佈：『𠊎膏油設立你做𠊎个子民以色列个王。
7 你愛㓾死若主人亞哈个全家。𠊎恁樣做，係愛為𠊎該兜先知㧯其他僕人被耶洗碧㓾死來報冤仇。
8 所有亞哈屋下个人㧯後代全部愛滅亡；𠊎愛對以色列當中除掉亞哈家族所有个男人，無論做奴才抑係自由身个全部愛除掉。
9 𠊎愛像對待尼八个孻仔耶羅波安王㧯亞希雅个孻仔巴沙王恁樣來對待亞哈个家族。
10 講到耶洗碧，無人會去埋葬姖；姖个屍體會在耶斯列地方被狗仔食掉。』」該後生先知一講煞就開門盡命走。
11 耶戶轉到同事該位；佢等問佢：「有麼介事？該癲仔來看你做麼介？」耶戶應講：「你等識佢，也知佢會講麼介。」
12 佢等講：「亂講，無講𠊎等樣會知！」耶戶講：「佢㧯𠊎講，上主恁樣宣佈：『𠊎膏油設立你做以色列个王。』」
13 耶戶該兜同事遽遽將佢等个外衫鋪在段仔頂高，喊耶戶企上去，然後歕羊角，大聲喊講：「耶戶做王了！」
14 恁樣，寧示个孫仔，約沙法个孻仔耶戶就計劃愛反約蘭。(先前約蘭㧯以色列眾人因為敘利亞王哈薛个緣故，看守基列个拉末。
15 該時約蘭王在耶斯列療傷，因為佢在拉末戰場㧯敘利亞王哈薛相㓾个時著傷。)耶戶對佢該兜同事講：「你等若擁護𠊎，就毋好俾人逃出拉末到耶斯列去報消息，一個也做毋得。」
16 所以耶戶坐上佢个戰車，去耶斯列。約蘭个傷還吂好；猶大王亞哈謝已經到該位去看佢。
17 在耶斯列守望臺頂企个守衛看到耶戶帶等一群人來，就喊：「𠊎看到一群人向這片來！」約蘭講：「派一個騎兵去迎接佢等，問佢等係帶來平安麼。」
18 騎兵就去迎接耶戶，對佢講：「王問，你等係帶來平安麼。」耶戶講：「係毋係平安干你麼介事？你跈在𠊎後背！」守望个人報告講：「使者到佢等該位，卻無轉來。」
19 王又派另外一個騎兵去。這人到佢等該位，講：「王問，你等係帶來平安麼。」耶戶又應講：「平安無平安干你麼介事？你跈在𠊎後背！」
20 守望个人又報告講：「使者到佢等該位，也無轉來。」佢又講：「駛戰車个人當狂，像係寧示个孫仔耶戶！」
21 約蘭下令講：「預備𠊎个戰車！」戰車預備好，以色列王約蘭㧯猶大王亞哈謝就自家坐自家个戰車出去迎接耶戶。佢等在耶斯列人拿伯个田肚堵到佢。
22 約蘭問佢：「耶戶，你係帶來平安麼？」耶戶應講：「𠊎等國內還有恁多若姆耶洗碧所行个淫亂㧯邪術，樣會有平安？」
23 約蘭斡轉戰車逃走，喊講：「亞哈謝啊，耶戶造反了！」
24 耶戶盡命拉弓，射到約蘭个背囊，一箭穿心；約蘭橫在戰車頂死掉。
25 耶戶對佢个助手畢甲講：「將佢个屍體㧒在耶斯列人拿伯个田肚！記得你㧯𠊎識共下跈約蘭个阿爸亞哈後背駛車麼；上主識對亞哈講過恁樣个預言：
26 『𠊎昨晡日看到拿伯㧯佢該兜孻仔被人謀殺；𠊎一定愛在這垤田肚責罰你！』這就係上主講个。所以，你愛將約蘭个屍體㧒在拿伯个田肚，實現上主个話。」
27 猶大王亞哈謝一看到所發生个事，就坐戰車向伯‧哈干城逃走。耶戶在後背追；佢命令部下：「將佢也㓾掉！」所以，在亞哈謝个戰車駛向姑珥个路上，近以伯蓮个地方，耶戶个部下將佢射到著傷。總係亞哈謝還係向前走，直到米吉多城正死在該位。
28 佢个部下用戰車載佢个屍體轉耶路撒冷，葬在大衛城个王室墳墓肚。
29 亞哈謝做猶大王个時係以色列王亞哈个孻仔約蘭在位个第十一年。
30 耶戶到耶斯列。耶洗碧聽到所發生个事，就梳頭打扮，對王宮个一個窗門向外看。
31 耶戶對城門入來个時，耶洗碧喊講：「你這隻像心利謀殺王个兇手，你會帶來平安麼？」
32 耶戶昂頭看窗仔，喊講：「麼人擁護𠊎？麼人？」有兩三個太監就對窗門擔頭看等佢。
33 耶戶對佢等講：「將姖㧒下來！」佢等就將耶洗碧㧒下來。姖个血噴到牆頂㧯馬仔。耶戶駛戰車輾過姖个屍體。
34 耶戶入去王宮，又食又啉，然後講：「將這個受咒詛个婦人家扛去埋掉；因為姖係王个妹仔。」
35 總係該兜去埋姖个人只有尋到姖个頭那殼㧯手腳个骨頭。
36 佢等轉去報告耶戶个時，佢講：「這就係上主通過佢僕人提斯比人以利亞所講愛發生个事。佢講：『狗仔愛在耶斯列个地方食耶洗碧个屍體；
37 賸到个屍體愛像田肚个糞堆，無人認得出該係耶洗碧。』」